எல்லா வேட்டைகளின் முடிவையும் காடுதான் தீர்மானிக்கிறது.

திண்டுகல்லில் நடந்த ஒரு நிகழ்ச்சிக்காக நண்பர்களுடன் பயணிக்கையில் தந்தை மகன் உறவில் இருக்கக் கூடிய அதீத அன்பைக் குறித்தும் வெறுப்பைக் குறித்தும் பேச்சு வந்தது.  கொமோரா, கானகன் என தொடர்ந்து தந்தைகளின் மீது மகன்களுக்கிருக்கும் வெறுப்பை எழுதுகிறவன் என்கிற வகையில் எனது தரப்பு வாதங்களை நான் விரிவாக எடுத்துவைத்துக் கொண்டிருந்தேன்.

எனது நண்பர்களில் ஒருவர் இடையீடாக  அப்போது பரபரப்பாக பேசப்பட்ட ஒரு செய்திக்குப் பின்னாலிருந்த சில சம்பவங்களைப் பகிர்ந்துகொண்டார். அதீதமான அன்பை மட்டுமே தந்த ஒரு தந்தைக்கு அவரது மகன் எத்தனை கொடூரமான முகத்தைக் காட்டினான் என்பதை அந்த சம்பவங்கள் உணர்த்தின. பன்றிவேட்டை என்னும் இந்தக் கதைக்கும் அந்த செய்திக்கும் தொடர்பில்லைதான், ஆனால் இந்தக் கதையின் துவக்கம் அந்த உரையாடலிலிருந்துதான் துவங்கியது.

            முதலில் இதனை ஒரு நெடுங்கதையாக எழுதியிருந்தேன். அந்தப் பிரதியை வாசித்த நண்பர்கள் ஒரு திரைப்படத்திற்கான வீச்சுகளோடு இருப்பதாக சுட்டிக்காட்டவும் உடனடியாக அதன் திரைக்கதை வடிவத்தை எழுதத் துவங்கிவிட்டேன். ஒரு கட்டத்தில் திரைப்படமாவதற்கான முன் தயாரிப்பு பணிகள்வரை எல்லாமே நடந்து முடிந்தன. நடிகர் நடிகையர் தயாரிப்பு என எல்லாமே கைகூடி வந்தபோது முதல் படமாக இத்தனை தீவிரமானதொரு கதையை எடுத்தால் தமிழ் சூழலில் எவ்வாறான வரவேற்பு இருக்ககூடுமென்கிற சந்தேகம் வர, தற்காலிகமாக இதனை நிறுத்தி வைப்பது என தயாரிப்பு தரப்போடு பேசி நிறுத்தி வைத்தோம். அதே காலகட்டத்தில் லிங்கம் என்கிற வலைத்தொடரைத் துவங்கி இதோ இன்னும் சில தினங்களில் அது வெளியாகவும் போகிறது. இடைபட்ட காலத்தில் பன்றி வேட்டையின் கதைக்குள் சில புதிய வெளிச்சங்கள் தென்பட்டதால் ஒரு நாவலாக எழுதிப் பார்க்கலாமென முடிவு செய்தேன்.

            கொமோராவைத் தவிர்த்து எனது எல்லா நாவல்களையுமே நெருக்கடியான காலகட்டங்களில் தான் எழுதியிருக்கிறேன். இந்த நாவலும் அப்படித்தான். ஒருபுறம் லிங்கம்  வலைதொடருக்கான வேலைகளும், அடுத்ததாக இயக்கவிருக்கும் திரைப்படத்திற்கான வேலைகளும் ஓடிக்கொண்டிருக்க அதற்கு நடுவிலேயே எனக்குப் பிடித்த இந்த நாவலை எழுதிக் கொண்டிருந்தேன். இந்த அசாத்தியமான வேலையைச் செய்வதற்கான மனநிலையை என்றென்றைக்கும் தக்கவைத்துக்கொள்ள வேண்டுமென்பதுதான் எனது விருப்பம்.

எனக்குப் பிடித்தமான மேற்குத் தொடர்ச்சிமலை, பளியர்கள், வேட்டை என எல்லாவற்றோடும் சேர்த்து  அதிகாரத்தில் இருப்பவர்களுக்கும் அதனை எதிர்க்க நினைக்கிறவர்களுக்குமான உள்முரண்களும் உண்டு. காடுகளைக் குறித்து எழுதும்போதேல்லாம் இன்னும்  நீ  சொல்லப்பட வேண்டியது அனேகமிருக்கிறது என்பதைத் தான் மனம் சுட்டிக்காட்டுகிறது. எப்போதும் போல் எனது நூலை சிறப்பாக வெளியிடும்  ஸீரோ டிகிரி பதிப்பகத்தின் ராம்ஜி மற்றும் காயத்ரி இருவருக்கும் எனது அலாதியான அன்பு. எல்லாம் வல்ல இறைவனுக்கும், நான் வணங்கும் இயற்கைக்கும், எனதன்பு மனைவி கார்கிக்கும் என்றென்றும் என் நன்றி.

லஷ்மி சரவணகுமார்

சென்னை